. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Saturday, August 15, 2009

മാവേലിക്കര | Mavelikkara | Kerala Tourism.

പൌരാണികമായ പ്രത്യേകതകളാല്‍ സമ്പന്നമായ മാവേലിക്കരക്ക് പക്ഷെ ചരിത്രത്തില്‍ നാനൂറ് വര്‍ഷങ്ങള്‍ക്കപ്പുറത്തേക്ക് എഴുതപ്പെട്ട ലിഖിതങ്ങള്‍ ഒന്നും തന്നെയില്ല എന്നത് ചരിത്രാന്വേഷണ കുതുകികള്‍ക്ക് നിരാശപകരുന്ന വാര്‍ത്തതന്നെയാവാം.


നാനൂറ് വര്‍ഷം മുന്നെ മാവേലിക്കര പരാമര്‍ശിക്കപ്പെട്ടിട്ടുള്ളത് ഒരു ചരിത്ര പുസ്തകത്തിലോ, പൌരാണികമായ ലിഖിതങ്ങളിലോ അല്ലെന്നുള്ളതും കൌതുകമുണര്‍ത്തുന്ന വസ്തുതയാണ്.


നാനൂറു വര്‍ഷത്തോളം പഴക്കം കല്‍പ്പിക്കപ്പെട്ടിട്ടുള്ള കണ്ടിയൂര്‍മറ്റം പടപ്പാട്ടിലാണ് ഏറ്റവും പഴയ മാവേലിക്കര പരാമര്‍ശം കാണാന്‍ കഴിയുക.


ചരിത്രം


അറിയപ്പെടുന്ന മാവേലിക്കരയുടെ ചരിത്രം തുടക്കമിട്ടിരിക്കുന്നത് മഠത്തിക്കൂര്‍ രാജവംശത്തിന്റെ അധിപനായ മാവേലി രാജാവില്‍ നിന്നാണ്. മാവേലിയാല്‍ ഭരിക്കപ്പെട്ടിരുന്ന ദേശം എന്ന നിലയിലാണ് ഈ പ്രദേശത്തിന് മാവേലിക്കര എന്ന പേരു കിട്ടിയത് എന്ന് ചരിത്രം പറയുന്നു.


മഠത്തിങ്കൂര്‍ രാജ്യത്തിന്റെ തലസ്ഥാനമായി നിശ്ചയിക്കപ്പെട്ടിരുന്നത് കമ്പവും കൂടല്ലൂരും ആയിരുന്നു.ഈ രാജ്യം ഏതാണ്ട് മദ്ധ്യതിരുവിതാംകൂര്‍ വരെ നീണ്ടുകിടന്നിരുന്നു.






അതിനു ശേഷം ഈ പ്രദേശങ്ങള്‍ ഓടനാട് എന്ന രാജ്യത്തിന്റെ ഭാഗമായി മാറി. ഈ രാജ്യത്തെ ഓണാട്ടുകര എന്നും അറിയപ്പെട്ടിരുന്നു. ഓണാട്ടുകരയുടെ ഭാഗങ്ങള്‍ ആയിരുന്നു ദേശിംഗനാട് (ഇന്നത്തെ കൊല്ലം) അതിനോടൊപ്പം ഇന്നത്തെ മാവേലിക്കര, കരുനാഗപ്പള്ളി, കാര്‍ത്തികപള്ളി താലൂക്കുകളും. കായംകുളം രാജാവിന്റെ അധീനതയിലായിരുന്ന ഈ രാജ്യത്തിന്റെ ആദ്യ തലസ്ഥാനം കണ്ടിയൂര്‍ മറ്റം ആയിരുന്നു. പിന്നീട് എരുവയും അതിനു ശേഷം കൃഷ്ണപുരവും തലസ്ഥാനമായി. പക്ഷെ 1746 ല്‍ മാര്‍ത്താണ്ട‌വര്‍മ്മ മഹാരാജാവ് ഓണാട്ടുകരയെ തിരുവിതാംകൂറിന്റെ ഭാഗമാക്കി തീര്‍ത്തു.


ഓണാട്ടുകര നാലു കോവിലകങ്ങള്‍ ചേര്‍ന്ന ഒരു പ്രദേശമായിരുന്നു. പേരകത്ത്, ചേറായി, പുതിയിടത്ത്, പഴയിടത്ത് എന്നിവ ആയിരുന്നു ആ കോവിലകങ്ങള്‍. പിന്നീട് ഓണാട്ടുകര വിഭജിച്ച് രണ്ട് ദേശങ്ങളായി മാറുകയുണ്ടായി. അതില്‍ ഒരു ഭാഗം വേണാട് രാജ്യവുമായി ലയിക്കുകയുണ്ടായി. മറ്റൊന്ന് കായംകുളം എന്ന രാജ്യമായി തുടര്‍ന്നു.


1737ല്‍ രാമയ്യന്‍ വേണാടിന്റെ ദളവയായി വാഴിക്കപെട്ടു. ഈ സമയത്തു തന്നെ അച്ചുത വാര്യര്‍ എന്ന കായംകുളത്തിന്റെ പടത്തലവന്‍ രാമയ്യന്‍ ദളവയാല്‍ കൊലചെയ്യപ്പെട്ടു. ഇത് കായംകുളത്തേയും വേണാട് രാജ്യത്ത് ലയിക്കാന്‍ പ്രേരിപ്പിച്ചു. ദളവ പിന്നീട് മാവേലിക്കരയെ ഒരു പ്രമുഖ വ്യാപാര കേന്ദ്രമാക്കി ഉയര്‍ത്തുകയും ചെയ്തു. രാമയ്യന്റെ കാലത്താണ് പ്രസിദ്ധമായ മാവേലിക്കര പണ്ടകശാല സ്ഥാപിക്കപ്പെട്ടത്.




1753 ല്‍ തിരുവിതാം കൂര്‍ രാജ്യം ഡച്ചുകാരുമായി ഒരു കരാറില്‍ ഏര്‍പ്പെടുകയുണ്ടായി. ഡച്ചുകാര്‍ ഒരിക്കലും തിരുവിതാംകൂറിനെ ആക്രമിക്കില്ല എന്ന ആ ഉടമ്പടി ഒപ്പിട്ടത് മാവേലിക്കരയില്‍ വച്ചായിരുന്നു. ഇതിന്റെ ഓര്‍മ്മക്കായി ഡച്ചുകാര്‍ ഒരു സ്തംഭ വിളക്കു മാവേലിക്കര ശ്രീകൃഷ്ണ ക്ഷേത്രത്തിന് സംഭാവന നല്‍കുകയുണ്ടായി. ഇന്നും പ്രൌഡിയോടെ നിലനില്‍ക്കുന്ന ഈ വിളക്കില്‍ ഒരു ഡച്ച് പട്ടാളക്കാരന്‍ തന്റെ തോക്ക് താഴേക്ക് ചൂണ്ടി നില്‍ക്കുന്ന ഒരു പ്രതിമയും കാണാന്‍ കഴിയും.


രാമയ്യന്‍ ദളവ മാവേലിക്കരയില്‍ ഒരു കോട്ടയും സ്ഥാപിക്കുകയുണ്ടായി. വേലുതമ്പി ദളവയുടെ കാലശേഷം 1809ല്‍ ബ്രിട്ടീഷ് ഭരണാധികാരിയായ ലോര്‍ഡ് മക്കല്ലം ഈ കോട്ട തകര്‍ത്തു കളഞ്ഞു. മാവെലിക്കര പട്ടണത്തിന്റെ ഹൃദയ ഭാഗത്ത് സ്ഥിതി ചെയ്യുന്ന സ്ഥലം ഇന്ന് കോട്ടക്കകം എന്ന പേരില്‍ അറിയപ്പെടുന്നു. മാവെലിക്കര ശ്രീ കൃഷണ ക്ഷേത്രത്തോട് വളരെ അടുത്തായി തന്നെ രാജ പ്രൌഡിയോടെ ദളവാ മഠവും സ്ഥിതി ചെയ്യുന്നു.


മാവേലിക്കരയോടുള്ള അമിത സ്നേഹം കാരണം ശ്രി മൂലം തിരുന്നാള്‍ ബാലരാമവര്‍മ്മ തമ്പുരാന്‍ ഇവിടെ നിന്ന് രണ്ട് പാണിഗ്രഹണം നടത്തുകയുണ്ടായി. അതില്‍ മൂത്ത ആള്‍ സേതു ലക്ഷ്മീഭായി തമ്പുരാട്ടി പിന്നീട് തിരുവിതാംകൂറിന്റെ റീജന്റ് (രാജപ്രതിനിധി) ആയി ഭരിക്കുകയുണ്ടായി. ഇളയയാള്‍ സേതു പാര്‍വ്വതീ ഭായി - ഇവരുടെ മകനാണ് പിന്നീട് അതി പ്രശസ്തനായ തിരുവിതാംകൂറിന്റെ അവസാനത്തെ രാജാവായ ശ്രീ ചിത്തിരതിരുനാള്‍.






രാജവംശവുമായി അടുത്ത ബന്ധുത്വം ഉള്ളതിനാല്‍ മാ‍വേലിക്കരക്ക് അന്നു നിലവിലുണ്ടായിരുന്ന എല്ലാ ആധുനിക സൌകര്യങ്ങളും കല്‍പ്പിച്ചു നല്‍കുകയുണ്ടായി. അതില്‍ പ്രമുഖമാണ് രാജവംശ കാലത്തു തന്നെ നിലവില്‍ വന്ന ട്രാന്‍സ്പോര്‍ട്ട് സ്റ്റേഷനും, ബസ് സര്‍വ്വീസും.


വളരെ പ്രശസ്തമായ ഉണ്ണിയാടി ചരിതം, ഉണ്ണുനീലി സന്ദേശം എന്നീ മഹാകാവ്യങ്ങളില്‍ ഓടനാടിനെകുറിച്ചും, കണ്ടിയൂരിനെ കുറിച്ചും വളരെ വിശദമായി പ്രതിപാദിച്ചു കാണുന്നു. ആ കാലത്ത് മാവേലിക്കരയില്‍ നിലനിന്നിരുന്ന പ്രസിദ്ധമായ കാര്‍ഷിക സംസ്കാരത്തിന്റെ തിരുശേഷിപ്പുകളായി നിലനില്‍ക്കുന്ന പലതരം ഉത്സവങ്ങള്‍ വര്‍ണാഭമായി ഇന്നും ആഘോഷിച്ചു വരുന്നു.


പിന്നീട് ബുദ്ധസംസ്കാരം മാവേലിക്കരയിലേക്ക് സന്നിവേശിക്കപ്പെട്ടു. ആ കാലത്ത് മാവേലിക്കരയില്‍ ആകെ ജനങ്ങളില്‍ ഏതാണ്ട് 90% ബുദ്ധമത വിശ്വാസികളായിരുന്നു എന്നു വിശ്വസിക്കപ്പെടുന്നു. ബുദ്ധമതത്തിന്റെയും, അത് പകര്‍ന്ന സാംസ്കാരിക ഉന്നതിയുടെയും ശേഷിപ്പുകള്‍ ഇന്നും മാവേലിക്കരയില്‍ കണ്ടെത്താന്‍ സാധിക്കും.


പിന്നീട് കൃസ്തുമതം കടന്നു വന്നപ്പോള്‍ മറ്റേതു പ്രദേശങ്ങളേയും പോലെ മാവേലിക്കരയും അതിനെ അതിഗാഡമായി തന്നെ ആശ്ലേഷിക്കുകയുണ്ടായി. വിവിധ മത, സംസ്കാരളെ സാംശീകരിച്ച് മാവേലിക്കര അതിന്റെ തനതായ ഒരു സംസ്കാരിക പെരുമ തന്നെ തീര്‍ക്കുകയുണ്ടായി. അതാണ് മാവേലിക്കരക്ക് മറ്റു ദേശങ്ങളില്‍ നിന്നുള്ള വ്യത്യാസവും.




കൊട്ടാരത്തില്‍ ശങ്കുണ്ണിയുടെ ഐതിഹ്യമാലയിലും മാവേലിക്കര പരാമര്‍ശിക്കപെട്ടിട്ടുണ്ട്.


1934 ജാനുവരി പത്തൊന്‍പതിന് മഹാത്മാഗാന്ധി മാവേലിക്കരയില്‍ ഒരു പ്രസംഗം നടത്തുകയുണ്ടായി. അന്ന് മാവെലിക്കര തട്ടാരംബലം ചിത്രോത്സവ മന്ദിരത്തിലായിരുന്നു ഗാന്ധിജിക്കു താമസവും, ഭക്ഷണവും. അന്ന് കൂടിയ മഹാ‍ സമ്മേളനത്തില്‍ ആര്‍ട്ടിസ്റ്റ് രാമവര്‍മ്മ തമ്പുരാന്‍, തട്ടാരംബലം രാമന്‍ പിള്ള, ശ്രീ ശുഭാനന്ദ ഗുരു എന്നീ പ്രമുഖരും പങ്കെടുത്തിരുന്നു. അന്ന് ഗാന്ധിജിയുടെ പ്രസംഗം മലയാളീകരിച്ചത് ശ്രീ മാന്നാര്‍ ഗോപാലന്‍ നായര്‍ ആയിരുന്നു.


ജന്മം കൊണ്ടോ, കര്‍മ്മം കൊണ്ടോ അനേകം പ്രമുഖ വ്യക്തികള്‍ക്ക് അവരുടെ പേര്‍ ലോകത്തിനു മുന്നില്‍ അവതരിപ്പിക്കാന്‍ മാവെലിക്കരയുടെ സാംസ്കാരിക പെരുമ അവരെ സഹായിച്ചിട്ടുണ്ട്.


ഹിന്ദു കൃസ്ത്യന്‍ മതസ്തരുടെ ഐക്യത്തിനു പേരുകേട്ട ഈ മണ്ണില്‍ അതിന് ഉപോതബലകമായി എല്ലാവര്‍ഷവും ഒരു ചടങ്ങ് നടക്കാറുണ്ട്. മാവേലിക്കര പുതിയകാവ് ദേവീ ക്ഷേത്രത്തിലെ പുറത്തെഴുന്നെള്ളിപ്പ് എതിരേല്‍പ്പ് എന്നീ ഉത്സവ ആഘോഷങ്ങള്‍ തുടങ്ങുന്നത് പുതിയകാവ് സെന്റ് മേരീസ് പള്ളിയില്‍ നിന്നാണെന്നുള്ളത് ഈ നൂറ്റാണ്ടിലെ അത്ഭുതമായി ഇന്നും തുടരുന്നു. നൂറ്റാണ്ടുകള്‍ മുന്‍പെ ആരംഭിച്ച ഈ ചടങ്ങ് മാവേലിക്കരയുടെ സാംസ്കാരിക പെരുമയുടെ മകുടോദാഹരണമായി ഇന്നും നിലനില്‍ക്കുന്നു.




പ്രസിദ്ധങ്ങളായ ആരാധനാലയങ്ങള്‍


മാവേലിക്കര താലൂക്കില്‍ പെടുന്ന ഏറ്റവും പ്രസിദ്ധമായ ക്ഷേത്രങ്ങളില്‍ മുന്‍പന്തിയില്‍ നില്‍ക്കുന്നത് ചെട്ടികുളങ്ങര ദേവീ ക്ഷേത്രമാണ്..ഇവിടുത്തെ കുംബ ഭരണിയോട് അനുബന്ധിച്ച് സംഘടിപ്പിക്കുന്ന കെട്ടുകാഴ്ച്ച വര്‍ണമഴതീര്‍ക്കുന്ന ഒന്നു തന്നെയാണ്. ലോക പ്രശസ്ത കുത്തിയോട്ടം സംഘടിപ്പിക്കുന്നതും ഈ ക്ഷേത്രത്തില്‍ തന്നെ.


ദക്ഷിണ കാശി എന്ന പേരില്‍ പ്രസിദ്ധമായ കണ്ടിയൂര്‍ മഹാദേവ ക്ഷേത്രവും മാവേലിക്കരയില്‍ തന്നെ.ലോക പ്രശസ്തമായ 108 ശിവ ക്ഷേത്രങ്ങളുടെ പട്ടികയില്‍ കണ്ടിയൂര്‍ മഹാദേവ ക്ഷേത്രവും സ്ഥാനം പിടിച്ചിട്ടുണ്ട്.




തിരുവിതാംകൂര്‍ ദേവസ്വത്തിന്റെ കീഴില്‍ പ്രവര്‍ത്തിക്കുന്ന മാവെലീക്കര ശ്രീകൃഷണ സ്വാമി കഷേത്രം, സര്‍സ്വതീ‍ ക്ഷേത്രം മാവേലിക്കര, പുതിയകാവ് ദേവീ ക്ഷേത്രം, ശ്രീ സുബ്രമണ്യ സ്വാമീ ക്ഷേത്രം തഴക്കര എന്നിവയാണ് മാവേലിക്കരയിലുള മറ്റ് പ്രമുഖ ക്ഷേത്രങ്ങള്‍.


പുണ്യപുരാതനമായ മാവേലിക്കര സെന്റ് മേരീസ് കതീഡ്രല്‍ പള്ളി മാവേലിക്കരയിലെ ക്രിസ്ത്യന്‍ പ്രൌണത വിളിച്ചറിയിക്കുന്നു. ഈ പള്ളിക്ക് 1000 വര്‍ഷത്തെ പഴക്കം ഉണ്ടെന്ന് ച്രിത്രകാരന്മാര്‍ അവകാശപ്പെടുന്നു. കാത്തോലിക്ക പള്ളി, CSI പള്ളി, മാര്‍ത്തോമാ പള്ളി, മലങ്കര കാത്തോലിക് പള്ളി എന്നിവയാണ് പ്രമുഖങ്ങളായ മറ്റ് ക്രിസ്ത്യന്‍ ദേവാലയങ്ങള്‍.






ഈ ദേവാലയങ്ങള്‍ക്ക് പുറമെ മാവേലിക്കരയുടെ മുസ്ലീം സമൂഹത്തിന്റെ പ്രതിനിധി എന്നവണ്ണം തലയെടുപ്പോടെ പട്ടണത്തിന്റെ ഹൃദയ ഭാഗത്തു തന്നെ മാവേലിക്കര ജുമാ മസ്ജിദും നിലകൊള്ളുന്നു.


മറ്റ് പ്രധാന വിവരങ്ങള്‍


പോളച്ചിറ കൊച്ചീപ്പന്‍ തരകന്‍, എ ആര്‍ രാജവര്‍മ്മ, ആര്‍ച്ച് ബിഷപ്പ് മാര്‍ ഇവാനിയോസ്, പടിഞ്ഞാറെ തലക്കല്‍ ജേക്കബ് കുര്യന്‍, സി എം സ്റ്റീഫന്‍, പാറപ്പുറത്ത്, ചിത്രമെഴുത്തു കെ. എം വര്‍ഗ്ഗീസ്, ശ്രീ ശുഭാനന്ദ ഗുരു ദേവന്‍, ടി കെ മാധവന്‍ എന്നിവര്‍ മാവേലിക്കരയുടെ പേര് ലോകത്തിന്റെ നേറുകയില്‍ എത്തിച്ച അനെകം പ്രമുഖരില്‍ ചിലര്‍ മാത്രം.


പ്രശസ്തമായ ബിഷപ്പ്‌മൂര്‍ കോളേജ്, രവി വര്‍മ്മ ഫൈന്‍ ആര്‍ട്സ് കോളേജ് എന്നിവ മാവേലിക്കരയില്‍ സ്ഥിതി ചെയ്യുന്ന പ്രമുഖ വിദ്യാഭ്യാസ സ്ഥാപനങ്ങള്‍ ആണ്. ഇതോടൊപ്പം ബിഷപ്പ് ഹോഡ്ജസ് ഹൈയര്‍ സെക്കണ്ടറി സ്കൂള്‍, സെന്റ് ജോണ്‍സ് ഹൈയര്‍ സെക്കണ്ടറി സ്കൂള്‍, എം എസ് എസ് ഹൈയര്‍ സെക്കണ്ടറി സ്കൂള്‍ എന്നിവ കൂടാതെ കേരളാ ഗവണ്മെന്റ് ഹൈയര്‍ സെക്കണ്ടറി സ്കൂളും മാവേലിക്കരയുടെ വിദ്യാഭ്യാസ മേഖലയെ സമ്പന്നമാക്കുന്നു.


ആലപ്പുഴ ജില്ലയില്‍ ഉള്‍പ്പെടുന്ന ഈ പ്രദേശം കേരളത്തിലെ ഏറ്റവും പഴക്കമേറിയ മുസിപ്പാലിറ്റികളില്‍ ഒന്നാണ്. ഈ പേരില്‍ ഒരു അസംബ്ലി മണ്ഡലവും, ലോകസഭാ മണ്ഡലവും നിലവിലുണ്ട്. മാവേലിക്കരയില്‍ റെയില്‍‌വേ സ്റ്റേഷനുണ്ട്. ഏറ്റവും അടുത്ത വിമാനത്താവളം തിരുവനന്തപുരം ആണ്.

32 comments:

നീര്‍വിളാകന്‍ said...

മാവേലിക്കരയെ കുറിച്ച് വിവിധയിടങ്ങളില്‍ നിന്ന് ശേഖരിച്ച വിവരങ്ങള്‍!

അരുണ്‍ കരിമുട്ടം said...

നാടിനെ കുറിച്ചുള്ള ഓര്‍മ്മകള്‍ വരുന്നു:)

ചാണക്യന്‍ said...

മാവേലിക്കരയുടെ ചരിത്രം നന്നായി....

കാപ്പിലാന്‍ said...

ഇനിയിപ്പോള്‍ കായംകുളത്തെ ക്കുറിച്ചാകാം അടുത്തത് അല്ലേ :) .

Rakesh R (വേദവ്യാസൻ) said...

puthiya arivukal pakarunna lekhanam :)

നിരക്ഷരൻ said...

കേരളത്തിലെ ഏതെങ്കിലും സ്ഥലങ്ങളെക്കുറിച്ച് അറിയാന്‍ കാട്ടാക്കട ദിവാകരന്റെ ഗ്രന്ഥമാണ് ഞാന്‍ ആശ്രയിക്കാറ്. പക്ഷെ അതില്‍ ചിത്രങ്ങളില്ല. എന്തായാലും തെക്കന്‍ ജില്ലകളെപ്പറ്റി നീര്‍വിളാകന്‍ എഴുതിയിടുന്ന പോസ്റ്റുകള്‍ കൂടെ ചേര്‍ത്ത് വായിക്കുമ്പോള്‍ ചിത്രം പൂര്‍ണ്ണമാകുന്നു. നന്ദി :)

ധനേഷ് said...

മാഷേ,
നല്ല വിവരണം.. കൂടുതല്‍ കൂടുതല്‍ പെരുമകളുമായി, ഭാവിയില്‍ ഇതൊരു റഫറന്‍സ് ഗ്രന്ഥം ആയിത്തീരട്ടെ..

pandavas... said...

വിവരണവും കൂടെ ഫോട്ടോകളും കൂടെ ആയപ്പോ രസമായീ

മുരളി I Murali Mudra said...

ഹൃദ്യമായ ഒരു വിവരണം ....
നമ്മുടെ നാട്ടിലെ സ്ഥലങ്ങളെപ്പറ്റി പലപ്പോഴും അറിയപ്പെടാത്തകാര്യങ്ങളെ പറ്റി നല്ല വിവരണം...ഇത് പോലുള്ള പോസ്റ്റുകളിലൂടെ കടന്നു പോകുമ്പോഴാണ് ,കൂടുതല്‍ അറിയുമ്പോഴാണ് വീണ്ടും വീണ്ടും ഈ സ്ഥലങ്ങള്‍ സന്ദര്ശ്ശിക്കാന്‍ തോന്നുന്നത്..
കേരളത്തിന്‍റെ ഇന്നലെയും ഇന്നും ഇത്തരം പോസ്റ്റുകളിലൂടെ വായനക്കാരില്‍ എത്തിക്കാന്‍ കഴിയുമാറാകട്ടെ എന്ന് ആശംസിക്കുന്നു..

vahab said...

സ്ഥലങ്ങളെ പരിചയപ്പെടുത്തുമ്പോള്‍ തുടക്കത്തില്‍ തന്നെ, പരാമര്‍ശിക്കപ്പെടുന്ന സ്ഥലം ഏതു ജില്ലയിലാണെന്നും കൃത്യമായ ലൊക്കേഷന്‍ എവിടെയെന്നും സൂചിപ്പിക്കുന്നത്‌ ഉപകാരപ്രദമായിരിക്കും. പ്രത്യേകിച്ചും ഒരേ പേരില്‍ വിവിധ പ്രദേശങ്ങള്‍ ഉള്ള സാഹചര്യത്തില്‍.

നിരക്ഷരന്‍ സൂചിപ്പിക്കുന്ന കാട്ടാക്കട ദിവാകരന്റെ പുസ്‌തകം ഏതാണ്‌? 'കേരള സഞ്ചാരം' ആണോ?
ആ പേരില്‍ ഒരു തടിച്ച പുസ്‌തകം ഒരു പുസ്‌തകമേളയില്‍ കണ്ടതോര്‍ക്കുന്നു. വളരെ ഉപകാരപ്രദമാണെന്നു തോന്നി. പിന്നീട്‌ പലയിടത്തും അന്വേഷിച്ചിട്ടും വിവരമൊന്നും കിട്ടിയില്ല.
'കേരള സഞ്ചാരം' എന്ന തടിച്ച പുസ്‌തകം ആരെഴുതിയതാണ്‌? അത്‌ എവിടെ കിട്ടും?

saju john said...

Dear Ajith,

Keep it up these type of informative posting....its really interesting. If you have further information about this place, update accordingly.

:)

അഭി said...

വളരെ മനോഹരമായിരിക്കുന്നു മാവേലിക്കരെയേ കുറിച്ചുള വിവരണം

കണ്ണനുണ്ണി said...

ഹരിപ്പാട് കാരനായത് കൊണ്ട് മാവേലിക്കരയും എനിക്ക് സ്വന്തം നാട് തന്നെ..
നന്നായിട്ടുണ്ട് മാഷെ വിവരണം...
ഇനി കായംകുളവും ഹരിപ്പാടും ആവട്ടെ

അനാഗതശ്മശ്രു said...

ഹരിപ്പാട് പെരുമ ഇതില്‍ കാണാം

http://haripadtemple.blogspot.com

G. Nisikanth (നിശി) said...

അറിവുള്ള അറിവിന്റെകൂടെ അറിയാത്ത അറിവുകളും കൂടിചേരുമ്പോൾ കൂടുതൽ അറിവാകുന്നു!!!

ചെറിയനാട്ടുകാരനായ എനിക്ക് മാവേലിക്കരയും ചെങ്ങന്നൂരും എല്ലാം ഒരുപോലെ… ഒരോ മുക്കും മൂലയും വീടെന്ന പോലെ പരിചിതം… മാവേലിക്കരയുടെ പ്രൌഢിയും സാംസ്കാരിക അവബോധവും ഒന്നുവേറേ തന്നെ. രാജകുടുംബങ്ങളുടെ സാന്നിദ്ധ്യം മാത്രമായിരുന്നില്ല അതിനു കാരണം, മറിച്ച് കലാ-സാംസ്കാരിക-സാഹിത്യരംഗങ്ങളിൽ വ്യക്തിമുദ്രപതിപ്പിച്ച ലോകപ്രശസ്തരായ പലർക്കും ജന്മം കൊണ്ടും കർമ്മം കൊണ്ടും വേദിയായതുകൊണ്ടായിരുന്നു അത്.

താങ്കൾ ചില പ്രധാനികളെ അറിയാതെ വിട്ടുപോയിട്ടുണ്ട്. മലയാളഭാഷയ്ക്ക് നിയതമായ നിയമാവലി തയ്യാറാക്കിയ കേരളപാണിനി ശ്രീ. ഏ.ആർ. രാജരാജവർമ്മയാണ് അതിൽ പ്രധാനി. മാവേലിക്കര ശ്രീകൃഷ്ണസ്വാമിക്ഷേത്രത്തിന് പടിഞ്ഞാറേ നടയിലുള്ള അദ്ദേഹത്തിന്റെ സ്മാരകമന്ദിരത്തിൽ കേരളത്തിലെ പ്രമുഖരായ സാഹിത്യകാരന്മാർ നിത്യേന ആദരാഞ്ജലികൾ അർപ്പിച്ചു അനുഗ്രഹം തേടുന്നു. കഥകളിച്ചെണ്ടയിൽ തന്റേതായ വ്യക്തിമുദ്ര പതിപ്പിച്ച, “ഉത്തരാസ്വയംവരം കഥകളികാണുവാൻ” എന്ന ഗാനത്തിൽ തമ്പി സാർ എടുത്തുപറഞ്ഞ ശ്രീ വാരണാസിയുടെ ഇല്ലം കണ്ടിയൂരാണ്. മൃദംഗത്തിൽ മഴവില്ലുതീർത്തിരുന്ന ശ്രീ മാവേലിക്കരകൃഷ്ണൻ‌കുട്ടിയും അതിലെ കണക്കിന്റെ ആശാനായിരുന്ന മാവേലിക്കര ശ്രീ വേലുക്കുട്ടിയും ഇന്നത്തെ അനേകം പ്രഗത്ഭരായ സംഗീതജ്ഞർക്കു ഗുരുവായിരുന്ന “മാവേലിക്കര ശ്രീ പ്രഭാകരവർമ്മ”യും അകാലത്തിൽ നമ്മെ വിട്ടു പോയ ചേട്ടൻ ബാവ നരേന്ദ്രപ്രസാദ് സാ‍റും മാവേലിക്കരക്കാർ തന്നെ. നിയോജകമണ്ഡലം മുഴുവൻ എടുത്തുപരിശോധിച്ചാൽ കഥകളിയിലെ ഭാവാഭിനയത്തിന്റെ ആശാനായിരുന്ന ശ്രീ ചെന്നിത്തല ചെല്ലപ്പൻ പിള്ളമുതൽ എണ്ണയ്ക്കാട് (ഗ്രാമം) കൊട്ടാരവുമായി ബന്ധമുണ്ടായിരുന്ന പ്രശസ്ത എഴുത്തുകാരായിരുന്ന തമ്പിസഹോദരന്മാരിലൂടെ രമേശ്‌ചെന്നിത്തലയിലൂടെ അങ്ങനെ അങ്ങനെ നീണ്ടുപോകും…. പിന്നെയും എടുത്തുപറയത്തക്ക ധാരാളം പ്രത്യേകതകൾ ഈ നാടിന് മാത്രം അവകാശപ്പെട്ടതായുണ്ട്….

താങ്കളുടെ ലേഖനം വളരെ പ്രയോജനപ്രദവും ഓണാട്ടുകരയുടെ സാംസ്കാരികപൈതൃകത്തിലേക്ക് വെളിച്ചം വീശുന്ന ഒന്നുമാണ്. സ്ഥലപുരാണങ്ങൾ തുടർന്നും പ്രതീക്ഷിച്ചുകൊണ്ട്.. അഭിനന്ദനങ്ങളോടെ,

നിശി
www.eenam.com

ഗന്ധർവൻ said...

“പുതിയകാവ് ദേവീ ക്ഷേത്രത്തിലെ പുറത്തെഴുന്നെള്ളിപ്പ് എതിരേല്‍പ്പ് “

മതത്തിനതീതമായ ആ കൂട്ടായ്മയെപറ്റി കേട്ടപ്പോൾ ഒന്നു കാണണമെന്നു തോന്നുന്നു.
മാവേലിക്കരയെപറ്റിയുള്ള വിവരണം നന്നായിട്ടുണ്ട്.
അഭിനന്ദനങ്ങൾ.

Sureshkumar Punjhayil said...

Valare vijnanapradam... Thanks for sharing it. Nalla vivaranam...!

Manoharam, ashamsakal...!!!

നിരക്ഷരൻ said...

@ വഹാബ്

കാട്ടാക്കട ദിവാകരന്റെ ഗ്രന്ഥം കേരളസഞ്ചാരം തന്നെ. വഹാബ് പറയുന്നത് പോലെ അതൊരു തടിയന്‍ പുസ്തകമാണ്. 800 രൂപയ്ക്ക് മുകളില്‍ വിലയുണ്ട്. പ്രസാധകരുടെ പേര് മറന്നു. ആവശ്യമെങ്കില്‍ നോക്കിയിട്ട് പറയാം. വീട് കുഴഞ്ഞ് മറിഞ്ഞ് കിടക്കുന്നതുകൊണ്ട് ഉടനെ നോക്കി പറയാന്‍ നിവൃത്തിയില്ല. പ്രസാധകരുടെ സ്റ്റാളില്‍ നിന്നോ അല്ലെങ്കില്‍ അവരുടെ ഓഫീസില്‍ നിന്നോ മാത്രമേ അത് കിട്ടൂ എന്നാണ് ഞാനത് വാങ്ങുമ്പോള്‍ അവരെന്നോട് പറഞ്ഞത്. മറ്റ് പുസ്തകസ്റ്റാളുകളില്‍ വില്‍ക്കുന്ന ഏര്‍പ്പാടില്ലത്രേ !! ഇത്രയും അമൂല്യമായ ഒരു ഗ്രന്ഥം അങ്ങനെ മൂടിപ്പൊതിഞ്ഞ് വില്‍ക്കുന്നതിന്റെ രഹസ്യം എനിക്ക് എത്ര ആലോചിച്ചിട്ടും മനസ്സിലായതുമില്ല.

പാവത്താൻ said...

മാവേലിക്കരയെപ്പറ്റി പുതിയ കുരെ കാര്യങ്ങല്‍ അരിയാന്‍ കഴിഞ്ഞു എന്നു ലജ്ജയോടെ അറിയിക്കട്ടെ.എന്റെ സ്ഥലം മാവെലിക്കരയ്ക്കുടുത്താണ്.

Sabu Kottotty said...

6347-48 ട്രയിനുകളില്‍ ഇതുവഴി പലവട്ടം ഞാന്‍ പോകുന്നുണ്ട് ഇത്രയും ചരിത്രം ഇവിടെയുറങ്ങുന്നുവെന്നത് എനിയ്ക്ക് പുതിയ അറിവാണ്. ചരിത്രം പഠിച്ചിട്ടില്ലെന്നതാണു സത്യം. അതിനാല്‍ ഈ പോസ്റ്റ് എനിയ്ക്കു വിലപ്പെട്ടതായി. കൊല്ലത്തിനടുത്തു കടയ്ക്കല്‍ ദേവീക്ഷേത്രത്തില്‍ കുംഭത്തിരുവാതിരനാള്‍ എടുക്കുന്ന എടുപ്പുകുതിരകള്‍ ഓര്‍മ്മയില്‍ വരുന്നു. ഒരുപാട് ഓര്‍മ്മകള്‍ മനസ്സില്‍ തെളിഞ്ഞുവരുന്നു, ഈ ഓര്‍മ്മപ്പെടുത്തലുകള്‍ക്ക് ഒരുപാടു നന്ദി...

Sreekumar B said...

നല്ല ഒരു സംരംഭം. ജന്മനാടിനെ കുറിച്ച്‌ പഠിക്കുകയും അതിന്റെ ചരിത്രവും, പുരാണവും. ഇതിഹാസവൗം അറിയുകയും അവ ബ്ലോഗിലൂടെ എല്ലാവരുമായി പങ്കു വയ്ക്കുകയും ചെയ്യുന്നത്‌ അഭിനന്ദനാർഹം തന്നെ. keep it up and best wishes
sreekumar
sree1010@gmail.com

OAB/ഒഎബി said...

അറിയിപ്പിനു നന്ദി.
സ്വന്തം നാടിന്റെ ചരിത്രം തന്നെ അനിക്കറിയില്ല. പണ്ട് മുതലേ ആലോചിക്കും വയസ്സായോരോട് ചോദിച്ച് കുറേ കാര്യങ്ങൾ അറിയണമെന്ന്.ആലോചിച്ച് അലോചിച്ച് ഇപ്പൊ എനിക്ക് വയസ്സായി. ഇനി ഇത് പോലുള്ളതൊക്കെ തന്നെ ആശ്രയം. നന്ദി സഹോദരാ,...താങ്കൾ പരിചയപ്പെടുത്തിയ മാവേലിക്കരയെ കൂടുതൽ അറിയാൻ കഴിഞ്ഞതിന്.

Anonymous said...

Thank you dear for giving such an information abt our own Kerala

vahab said...

മുകളിലെ പ്രതികരണത്തില്‍ ഒരു കാര്യം വിട്ടുപോയി- നമ്മുടെ നാടിനെ അടുത്തറിയാന്‍ സഹായിക്കുന്ന, മണ്ണിന്റെ മണമുള്ള ഈ ബ്ലോഗെഴുത്ത്‌ വളരെ ഹൃദ്യമായി. നീര്‍വിളാകന്‌ അഭിനന്ദനങ്ങള്‍....!

@ നിരക്ഷരന്‍...
മറുപടിക്ക്‌ നന്ദി... കൂടുതല്‍ വിവരങ്ങള്‍ വഴിയെ പ്രതീക്ഷിക്കട്ടെ.

madhupal said...

nannaayi refer cheythittund.. jeevichavarum marichavarum maavelikkaraye yasassileekkuyarththiyavarum koodi aayaal kooduthal nannaavumennoru thonnal

Muralee Mukundan , ബിലാത്തിപട്ടണം said...

മാവേലിക്കരക്ക് ചരിത്രത്തിൽ നമ്മുടെ മാവേലിയുമായി ബന്ധമൊന്നുമില്ലേ..?
എന്തായാലും ജന്മനാടിന്റെ നന്നായിരിക്കുന്നു..കേട്ടൊ..

Dr. Prasanth Krishna said...

എ. ആര്‍ രാജരാജ വര്‍മ്മയിലൂടെ ഭാഷാ സ്നേഹികള്‍ മാവേലിക്കരയെ അറിഞ്ഞപ്പോള്‍ മാവേലിക്കരയുടെ നാമം ജനകീയമാക്കിയത് നാടക ചലച്ചിത്ര നടി മാവേലിക്കര പൊന്നമ്മയാണ്. ഇംഗ്ലണ്ടിലെ ഇന്ത്യന്‍ ഹൈക്കമ്മീഷണറും തമിഴ്‌നാട്, മഹാരാഷ്ട്ര സംസ്ഥാനങ്ങളുടെ മുന്‍ ഗവര്‍ണര്‍ ആയിരുന്ന ഡോ. പി.സി. അലക്സാണ്ടര്‍ മാവേലിക്കരയുടെ നാമം കറ്റല്‍ കറ്റത്തിയ വ്യക്തിത്വമാണ്. കമ്യൂണിസ്റ്റ് നേതാവായിരുന്ന ഇറവങ്കര ഗോപാലക്കുറുപ്പിനോളം മറ്റു വ്യക്തികളെ മാവേലിക്കരക്കാര്‍ നെഞ്ചേറ്റിയിട്ടുണ്ടന്നു തോന്നുന്നില്ല.

കേരളത്തിലെ മറ്റ് പല സ്ഥലങ്ങളേയും അപേക്ഷിച്ച് കോട്ടയവും മാവേലിക്കരയും മാത്രമാണ് ലോക വ്യാവസായിക ഭൂപടത്തില്‍ സ്ഥാനം പിടിച്ചിട്ടുള്ളത്. ക്ലോപാസ്മൈന്‍ നിര്‍മ്മിക്കുന്ന ലോകത്തിലെ ചുരുക്കം സ്ഥാപനങ്ങളില്‍ ഒന്നായ സാങ്രോസ് ലബോറട്ടറീസ് മാവേലിക്കരയിലാണ്. അതുപോലെ കെ.എസ്.ആര്‍.ടി.സി യുടെ ബസ് ബോഡി നിര്‍മ്മാണ യൂണിറ്റ് മാവേലിക്കരയിലുണ്ട്.

ഇതിനൊക്കെ ഉപരിയായ് മാവേലിക്കര ചെറുകോല്‍ ശ്രീ ശുഭാന്ദാശ്രമം ലോക പ്രശസ്തമായ തീര്‍ത്ഥാടനകേന്ദ്രമാണ്. മാവേലിക്കരയിലെ ഏറ്റവും പ്രശസ്തമായ തീര്‍ത്ഥാടനകേന്ദ്രവും ഇതുതന്നെ.

നീര്‍‌വിളാകന്‍, പോസ്റ്റുവായിക്കുന്നവര്‍ കുമിഞ്ഞുകൂടുന്ന കമറ്റുകള്‍ വായിക്കാന്‍ സാധ്യതകുറവായതിനാല്‍, ഈ കമന്റിലെ കാതലായകാര്യങ്ങള്‍ വിരോധമില്ലങ്കില്‍ പോസ്റ്റില്‍ ചേര്‍ത്താല്‍ നന്നായിരുന്നു.
കമന്റ് അപ്പാടയോ എഡിറ്റ് ചെയ്തോ താങ്കളുടെ ഇഷ്ടം പോലെ ഉപയോഗിക്കവുന്നതാണ്.

Jenshia said...

നല്ല ലേഖനം..വളരെ വിജ്ഞാനപ്രദം ..

തുടരുക...ആശംസകള്‍..

അനില്‍@ബ്ലോഗ് // anil said...

വളരെ വിജ്ഞാനപ്രദമായിരിക്കുന്നു.
മാവേലിക്കര ഇടക്കിടെ വരാറുണ്ടെങ്കിലും ഇത്രയും വിവരങ്ങള്‍ ഉറങ്ങിക്കിടക്കുന്ന സ്ഥലമാണെന്ന് ശ്രദ്ധിച്ചിരുന്നില്ല.

nadeem noushad said...

very useful and informative study

nadeem noushad said...

very useful and informative study

Unknown said...

Realy an useful information. Even I am Mavelikarite , some of the informations are new to me....great...
I don't have malayalam fond in my system , otherwise I will write in our mother tounge..

Unnikrishnan
New Delhi